ალექსანდრე ჯეჯელავა – ბევრი ადამიანია, ვინც არ ფიქრობს რა იქნება ქვეყნისთვის უკეთესი და ამით შეიძლება ვიზალიბერალიზაციის პროცესი დააზარალოს

მთავარი გვერდის ჩანაწერები

38cd4ebd4ad84664dd177343ccbee07aძალიან ბევრი ადამიანია, ვინც ხანდახან არ ფიქრობს რა იქნება ქვეყნისთვის უკეთესი და შეიძლება ამით დააზარალოს თუნდაც ვიზალიბერალიზაციის პროცესი – ამის შესახებ განათლებისა და მეცნიერების მინისტრმა, ალექსანდრე ჯეჯელავამ კითხვის – უკავშირდება თუ არა საქართველოში მიმდინარე შიდაპოლიტიკურ პროცესებს, ვიზალიბერალიზაციასთან დაკავშირებით ევროკავშირის ელჩების შეუთანხმებლობა, საპასუხოდ განაცხადა.

როგორც მინისტრი აღნიშნავს, საქართველო ევროპის განუყოფელი ნაწილია და ადრე თუ გვიან, აუცილებლად გახდება ევროპული ოჯახის წევრი.
“ჩვენ რომ ვაპირებდეთ განვითარებულ და აყვავებულ ქვეყანაში, განვითარებადი ქვეყნებიდან ხალხის უვიზოდ შემოშვებას, ჩვენც ძალიან კარგად დავფიქრდებოდით. ამიტომ ელჩების მსჯელობა და განსხვავებული მოსაზრებები, ჩემი აზრით, ბუნებრივია. თუმცა, მე დარწმუნებული ვარ, რომ საბოლოო ჯამში ჩვენ მივიღებთ ვიზალიბერალიზაციას. საქართველო არის ევროპის განუყოფელი ნაწილი და შეიძლება ამას დასჭირდეს რამდენიმე თვით მეტი ან ნაკლები, მაგრამ ჩვენ აუცილებლად გავხდებით როგორც ვიზალიბერალიზაციის თვალსაზრისით ევროპული ოჯახის წევრი, ასევე სხვა თვალსაზრისით”, – განაცხადა ჯეჯელავამ.
რაც შეეხება შიდაპოლიტიკურ პროცესებთან კავშირს, განათლების მინისტრი მიიჩნევს, რომ ელჩები ყურადღებას ამასაც აქცევენ, თუმცა აქვე აღნიშნავს, რომ არ ჰგონია, ელჩების შეუთანხმებლობა რაიმე კონკრეტულ ფაქტს უკავშირდებოდეს, რომელიც საქართველოში ხდება.
”შიდა პოლიტიკური პროცესები ქვეყნის ცხოვრების ინტეგრალური ნაწილია და, რა თქმა უნდა, ევროკავშირის ელჩებიც და სხვებიც, ამასაც მიაქცევენ ყურადღებას. მითუმეტეს, რომ ძალიან ბევრი ადამიანია, ვინც სამწუხაროდ, საკუთარი პოლიტიკური თუ სხვა ინტერესების გამო, ხანდახან არ ფიქრობს რა იქნება ქვეყნისთვის უკეთესი და შეიძლება ამითი დააზარალოს თუნდაც ვიზალიბერალიზაციის პროცესი ან სხვა რამ. კონკრეტულად არავის არ ვგულისხმობ. ვგულისხმობ იმ ხალხს, ვინც ასე ვთქვათ, რაღაც ნეგატიურ ინფორმაციას ავრცელებს გადაჭარბებულს, არარეალურს, იმასთან დაკავშირებით რაც ქვეყანაში ხდება”, – განაცხადა განათლებისა და მეცნიერების მინისტრმა.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *